BGlobal Ventures аймақтарда венчурлік инвестициялар бойынша воркшоптар сериясын іске қосты

BGlobal Ventures халықаралық инвестициялық холдинг Raison, Astana Venture Club және Astana Hub-пен бірлесіп, аймақтарда венчурлік инвестициялар бойынша білім беру воркшоптар сериясын іске қосты. Алғашқы шаралар Атырау мен Ақтауда аймақтық хабтарда өтті. Мұндай білім беру кездесулеріне не себеп болды және аудитория қалай қабылдады? Осы мақалада толығырақ білесіз.

Идея

BGlobal Ventures бас директоры Абай Әбсаметтың айтуынша, Қазақстанда инвестициялық белсенділік негізінен Астана мен Алматыда шоғырланған жаңа тренд пайда болды, ал аймақтар екінші қатарда қалып отыр. Мұның бір себебі – аймақтық кәсіпкерлердің венчурлік капиталмен таныс еместігі әрі олар дәстүрлі инвестиция құралдарын, мысалы, қор нарығын немесе жылжымайтын мүлікті жөн көреді.

"Ақпараттық теңгерім құру үшін, біз білім беру бағдарламаларының сериясын бастауды шештік, алғашқысын Ақтау мен Атырауда өткіздік. Мақсатымыз – аудиторияны венчурлік капиталмен, оның мүмкіндіктері мен тәуекелдерімен таныстырып, теориялық біліммен ғана емес, нақты кейстермен де қамтамасыз ету", – дейді Абай Әбсамет.

Алғашқы шаралар үлкен қызығушылық тудырды – әр қалада 30-ға жуық адам қатысты, олардың арасында әлеуетті және қазіргі инвесторлар, кәсіпкерлер, стартап негізін қалаушылар мен бизнес көшбасшылар бар.

"Венчурлік инвестицияларға арналған семинарлар үшін Атырау мен Ақтаудың таңдалуы – олардың стратегиялық орналасуына, дамыған инфрақұрылымына, ресурстарға қолжетімділігіне байланысты. Бұл қалалар мұнай-газ өнеркәсібінің жүрегінде орналасқан, мұнда бизнесті әртараптандыруға қызығушылық білдіретін компаниялар көп, сондықтан венчурлік инвестиция тақырыбы аса өзекті", – дейді Astana Venture Club негізін қалаушы және басшысы Нұрасыл Жарбасов.

Спикерлер не туралы айтты?

Воркшоп барысында спикерлер венчурлік инвестициялардың барлық аспектілерін қамтыды: Қазақстандағы осы бағыттың болашағы, нарықтың қазіргі жағдайы, инвесторларға арналған жаңа мүмкіндіктер мен тәуекелдер туралы айтты. Соңғы пунктке ерекше назарды Raison холдингінің негізін қалаушы Андрей Березин аударды.

"Венчурлік инвестициялар жоғары тәуекелге ие, бірақ табыс табуға зор мүмкіндік береді. Бизнес-ангел болмас бұрын, стартаптардың әлеуеті мен өсуге дайындығын мұқият талдау аса маңызды. Бізде болашағы жарқын жобаларды анықтауға көмектесетін өзіміздің бағалау критерийлеріміз бар", – деді спикер.

Венчурлік инвестициялардағы трендтер

Аудитория венчурлік инвестициялардағы трендтерге де үлкен қызығушылық танытты.

"2024–2025 жылдары венчурлік инвестицияларды әрі қарай дамытатын негізгі бірнеше трендті көреміз. Біріншіден, жасанды интеллект. Кейбір стартаптар АІ технологиясын процестерді автоматтандыруға қолданса, енді бірі нейрожелілерге негізделген жаңа өнімдер жасайды. Тағы бір өзекті бағыт – жасыл технологиялар (биотехнология, цифрлық денсаулық сақтау, финтех, киберқауіпсіздік және ақпаратты қорғау технологиялары). Тұрақты даму мен климаттың өзгеруі – барлық адам үшін маңызды тақырыпқа айналуда, осы салада инновациялық шешім ұсынатын компаниялар ерекшеленеді", – деп атап өтті Андрей Березин.

Цифрландырудың өсуімен бұл салаға инновациялық шешімдер ұсынатын компаниялардың ірі корпорациялар мен мемлекеттік ұйымдар үшін маңыздылығы артты, – деп қосты ол.

Бірақ сарапшы "трендтің" соңынан қуу әркез дұрыс таңдау емес екенін аудиторияға ескертті. Бастапқы инвесторларға нарықтағы уақытша толқындарға ергеннен көрі, ұзақ мерзімді перспектива мен стартап туралы нақты деректерге сүйеніп, өз көру танымын қалыптастыру маңызды.

Кері байланыс

Astana Venture Club негізін қалаушы әрі басшысы Нұрасыл Жарбасовтың айтуынша, воркшопқа қатысушылардың пікірталасқа белсенді араласуы осындай шаралардың қажеттілігін растады.

Қатысушылар венчурлік инвестицияның практикалық аспектілеріне, қаржыландыру стратегияларына, сәтті кейстерге және бизнес-ангелдіктің алдында тұратын қиындықтарға қызығушылық танытты.

"Көптеген кәсіпкерлер бұл семинарлар венчурлік инвестиция туралы алғашқы қадам болғанын, әрі білімін жалғастыруға ниет білдіргенін айтты. Бұл аймақтарда осы тақырыпқа қызығушылықпен қатар, нақты сұраныс бар екенінің жақсы көрсеткіші", – деді Нұрасыл Жарбасов.

Келесі қадам қандай?

Абай Әбсаметтың айтуынша, бұл бастама венчурлік инвестиция әлемімен алғашқы танысу.

"Осылайша, адамдар бұл саланы көзбен көріп, оның инвестициялық құрал ретінде қаншалықты тартымды екенін өздері шеше алады. Егер адам қызығушылық танытса, біз келесі қадам ұсынамыз – бизнес-ангел қауымдастықтарына қосылу, осылайша пікірлес ортаға еніп, стартаптар іздеуді бастау", – деп қосты BGlobal Ventures басшысы.

Білімнің негізгі базасы ретінде BGlobal Ventures Silkroad Innovation Hub және Eurasian Business School серіктестігімен бірлесіп, Силикон алқабынан алынған тәжірибе мен кейстер негізінде венчурлік инвестиция курсын ұсынады. Алғашқы лег шілде айында өтті, екіншісі қазан айында басталды, ал соңғысы осы жылы қарашада өтеді. Барлық бағдарламалар біздің сайтта қолжетімді.

Нұрасыл Жарбасовтың айтуынша, семинарлар сериясынан кейін Қазақстанда венчурлік инвестицияларда жаңа мүмкіндіктер ашылады:

"Біз стартаптарға қаржыландыру мен менторлыққа қолжетімділік беру үшін, ал инвесторларға тартымды жобалар іздеуге мүмкіндік жасағымыз келеді. Мақсатымыз – инновациялық идеяларды қолдауға және дамытуға дайын тұрақты қауымдастықты құру. Бұл Қазақстан экономикасын күшейтудегі, жаңа жұмыс орындарын ашудағы және елдің халықаралық аренадағы бәсекеге қабілеттілігін арттырудағы маңызды қадам болмақ".

Толығырақ оқу